sábado, 9 de marzo de 2024

8M. DÍA DA MULLER

Unha das datas máis destacadas deste mes de marzo é, sen dúbida, o día 8, xornada na que ten lugar a reivindicación da figura da muller na sociedade.


Unha das actividades que se levou a cabo no noso centro para conmemorar esta data foi a visita da compañía compostelá Medievándalos, a cal nos representou unha obra de teatro titulada “A cabaleira”, na que coñecemos as aventuras dunha princesa que non desexaba ser raíña, senón cabaleira.


Facede clik na seguinte imaxe para ver algunhas fotografías do noso alumnado desfrutando desta peza teatral. 


jueves, 29 de febrero de 2024

23F. DÍA DE ROSALÍA

Benvidas e benvidos de novo! Este mes de febreiro foi ben intenso. Ademais de festexar o tan ansiado Entroido, como así se pode ver no blogue do EACE do noso centro, dedicamos esta última quincena a traballar a figura dunha das escritoras galegas máis ilustres: Rosalía de Castro, coincidindo co aniversario do seu nacemento (23 de febreiro de 1837).


Mais alá do traballo específico desenvolto dentro de cada unha das aulas do colexio, o alumnado de 3º, 4º, 5º e 6º de Primaria versionou, ensaiou e recitou diferentes poemas desta autora e foinos recitar ás aulas do resto de niveis do centro. Facendo click na imaxe poderedes ver imaxes desta actividade.




Por outra banda, os nenos e nenas do 3º ciclo elaboraron distintos fotopoemas con composicións de Rosalía cos que crearon un mural nun dos corredores do centro. Unha vez pasada esta data, encadernarán todas estas producións para crear un novo fondo de consulta para a nosa biblioteca. Tocade a imaxe se queredes ver individualmente cada un deles.




Noraboa a todos e todas e grazas polo voso traballo!

martes, 30 de enero de 2024

30X: DÍA ESCOLAR DA NON VIOLENCIA E DA PAZ

Hoxe, coma cada 30 de xaneiro, coincidindo co aniversario do falecemento de Mahatma Gandhi (1869-1948), conmemoramos o Día Escolar da Non Violencia e da Paz no noso centro. Durante estes días estivemos realizando diferentes actividades vinculadas con esta temática. Por exemplo, nas sesións de Lingua Galega e Literatura, as diferentes clases do colexio crearon distintas composicións poéticas relacionadas coa paz.
Por outra banda, o alumnado do terceiro ciclo foi o encargado de elaborar un mural, situado na entrada do centro, baseándose na temática desta xornada. Realizaron unha adaptación dunha das obras dun enigmático artista británico que firma baixo o seudónimo de Banksy. Escolleron “Kids on guns” (Nenos sobre armas), unha obra que busca antepoñer a inocencia e o cariño da infancia á violencia e á opresión. Colocaron tamén corazóns vermellos nos que incluíron o nome de lugares que actualmente, por desgraza, están en guerra, escribindo debaixo a palabra “paz” na súa lingua oficial.
Finalmente, como clausura a esta conmemoración, todos os alumnos e alumnas do centro, xunto co profesorado e as familias que puideron asistir, realizaron un acto que no que leron algunhas das composicións poéticas que eles mesmos e mesmas crearan na aula. Ademais, tamén tocaronImagine”, de John Lennon, coa frauta e realizaron tres bailes. En breves poderedes atopar fotografías e vídeos desta xornada no blog do Equipo de Actividades Complementarias e Extraescolares do noso centro.

miércoles, 24 de enero de 2024

HARRY POTTER: CONTINUAMOS AVANZANDO NO PROXECTO

Voltamos do Nadal coas pilas recargadas e con ganas de pasar á segunda fase do noso proxecto de centro: a elaboración dun guión cinematográfico. As alumnas e alumnos do terceiro ciclo xa comezaron a mergullarse neste proceso. Despois da lectura da obra de "Harry Potter y la piedra filosofal" e do visionado da película, foron elaborando un pequeno mural no que anotaron varias diferenzas que detectaron entre ambos.
Posteriormente, e tomando a obra escrita como referencia, cada nivel deste ciclo, por separado, fixo varias propostas sobre que partes lles parecían unha boa opción para rodar unha curtametraxe e realizaron unha votación para escoller a escena gañadora en cada curso. Agora que xa teñen en mente a secuencia que van gravar, están a elaborar o vestiario necesario para a rodaxe, o cal, ademais, será o seu disfrace no desfile de Entroido que celebraremos en breves. Tras a toma de medidas, a elaboración dos patróns e o corte das telas, chegou o momento de coser as túnicas, empregando a máquina coa que contamos no centro, grazas ao material de Polos Creativos. Menudo taller de costura que teñen montado!
Por outra banda, tamén andan a elaborar as variñas máxicas que cada un levará, empregando paus e arcilla.
Seguiremos informando dos avances no proceso! Clicka na imaxe para acceder ao espazo web específico do noso proxecto: 3º ciclo de EP. Harry Potter e a Pedra Filosofal.

sábado, 16 de diciembre de 2023

RECOMENDACIÓNS LECTORAS PARA O NADAL

 O Nadal está ao caer e, como non, moitos e moitas xa levan tempo dándolle voltas ao tema dos agasaios. Por iso mesmo, dende a biblioteca do cole querémosvos dar algunhas ideas sobre varios libros que pensamos que vos poderían gustar e que serían unha boa opción para pedir por estas datas.

Agardamos que vos sirvan de axuda!

jueves, 14 de diciembre de 2023

SESIÓN DE CINE: "HARRY POTTER Y LA PIEDRA FILOSOFAL"

 Boas a todas e todos! Como ben sabedes, achégase o Nadal e, polo tanto, tamén o remate do primeiro trimestre. Como xa dixemos en entradas anteriores, estamos adicando este curso a traballar libros que contan cunha produción audiovisual posterior. Por este motivo, e como non podía ser doutro xeito, unha sesión de cine tiña que estar presente entre as nosas actividades si ou si.

Hoxe, 14 de decembro, o alumnado de 5º e 6º de Educación Primaria desfrutou da proxección na gran pantalla de  "Harry Potter y la piedra filosofal". Despois da lectura da obra de J. K. Rowling e das tertulias literarias dos diferentes capítulos, os máis maiores do cole estaban ansiosos xa por ver xuntos esta película do ano 2001. Invitaron tamén aos nenos e nenas de 4º para que os acompañasen neste visionado, o cal estivo, por suposto, acompañado duns ricos flocos de millo.

De agora en diante tocaralles analizar as diferenzas entre a obra escrita e a peli e ir facendo propostas sobre que fragmento desexan reproducir eles no produto final ao que queremos chegar: unha curtametraxe sobre unha obra literaria clásica.

Clickade aquí para acceder ao espazo web específico do noso proxecto: 3º ciclo de EP. Harry Potter e a Pedra Filosofal.




miércoles, 29 de noviembre de 2023

NOVEMBRO: MES DA CIENCIA EN GALEGO NAS BIBLIOTECAS

 Boas a todas e todos! Rematamos o penúltimo mes do ano, durante o cal, entre outras moitas cousas, estivemos a falar e traballar sobre a ciencia, empregando o galego coma lingua vehicular. 

Ademais dos libros sobre esta temática (os cales, debemos admitir, non é que sexan moi abundantes na lingua da nosa comunidade), a actividade que máis éxito tivo foron, sen dúbida, os obradoiros de Mundobichos. Neles os nenos e nenas puideron ver en primera persoa, e mesmo ter na man, diferentes insectos e arácnidos, ademais de aprender sobre a súa morfoloxía e reflexionar sobre as diferentes estratexias evolutivas levadas a cabo por cada unha das distintas especies.





jueves, 2 de noviembre de 2023

BO SAMAÍN! HAPPY HALLOWEEN

Canto nos gusta unha festa! Definitivamente, a celebración do Samaín, o cal deu lugar ao mundialmente coñecido Halloween, estase a converter nun dos momentos favoritos de finais de ano, tanto de peques coma de maiores. 

Como non podía ser doutro xeito, nós tamen adicamos estes últimos días do mes de outubro a preparar o festexo desta data. Ademais de buscar información e falar sobre a orixe desta festividade, decoramos os nosos corredores para darlles un toque de tenebrosidade. As e os peques de Educación Infantil, xunto coas súas mestras, encargáronse de elaborar un chamativo mural para a entrada do cole, inspirándose en contos de Samaín que traballaron na aula para decorar cada unha das letras.

Así mesmo, o alumnado do terceiro ciclo de Educación Primaria, coordinados polas profes de Inglés, debuxaron e colorearon diferentes personaxes “aterradoras” ou “lúgubres”, moitas delas sacadas das obras relacionadas co proxecto de centro que cada aula está a traballar. Con elas elaboraron un recuncho de “SCARY HALLOWEEN”, no que, posteriormente, colocamos as diferentes e orixinais cabazas que os nenos e nenas foron traendo ao centro.

Tamén decoramos a nosa biblio acorde ás datas festexadas, para que cada aula puidese baixar a ela para realizar “lecturas terroríficas”.

Ademais diso, o alumnado de sexto curso preparou, por grupos, unha obra de teatro de sombras relacionada co Samaín, redactando eles mesmos o seu guión e elaborando as súas siluetas. Unha vez ensaiada, diversas clases foron pasando pola aula de Lingua Castelá para asistir coma público.

Chegado o ansiado día, o martes, 31 de outubro, nenos, nenas, mestres, mestras e demais persoal do centro viñemos cos nosos “looks” máis tétricos para festexar esta data. Despois do recreo, todas e todos saímos ás pistas e bailamos varias cancións que o alumnado estivera a preparar nas horas de Música. Poderedes atopar o vídeo no blog do equipo de Actividades Complementarias e Extraescolares do noso cole. 

Posteriormente, logo destas tétricas danzas, voltamos cada clase á súa aula para finalizar a celebración desta tenebrosa e divertida festividade.

sábado, 28 de octubre de 2023

24 DE OUTUBRO: DÍA DAS BIBLIOTECAS ESCOLARES

Esta semana celebramos o Día das Bibliotecas Escolares, o cal, este ano, tivo lugar o martes, 24 de outubro. Para conmemorar esta data levamos a cabo diferentes actividades no centro vinculadas coa biblio e coa dinamización dos seus libros.

Por unha banda, as alumnas e alumnos de terceiro e cuarto curso gravaron “booktubers” facendo recomendacións lectoras sobre obras que se poden atopar na nosa biblioteca. Proximamente poderedes botarlles un ollo por aquí.

Por outra banda, o alumnado de quinto curso realizou, por grupos, lecturas de contos de Samaín aos peques de infantil e do primeiro ciclo de primaria. Para iso, cada clase seleccionou un libro da súa biblioteca de aula ou da do centro e deixóullelo prestado aos nenos e nenas de quinto para que o coñecesen e puidesen preparalo previamente. Chegado o día, durante o tempo de lectura, cada grupo dirixiuse á aula que lle fora asignada para realizar a lectura dramatizada do conto elixido.